काठमाडौं /लुम्बिनी लायन्स नेपाल प्रिमियर लिग (एनपीएल) टी–२० क्रिकेटको फाइनलमा प्रवेश गरेको छ। विराटनगर किंग्समाथि प्रभावशाली जित दर्ता गर्दै लुम्बिनी पहिलोपटक उपाधि भिडन्तमा पुगेको हो।

१३५ रनको विजयी लक्ष्य पछ्याएको विराटनगर १७।५ ओभरमै अलआउट हुँदै ९४ रनमा समेटियो। विराटनगरका साम हाज्लेटले ३४ तथा नरेन भट्टले २१ रन जोडे। लुम्बिनीका तिलक भण्डारीले उत्कृष्ट प्रदर्शन गर्दै ३ विकेट लिए भने जे. स्मिथ, अभिषेक गौतम र रुबेन ट्रम्पलम्यानले समान २–२ विकेट हात पारे।

यसअघि टस हारेर पहिले ब्याटिङ गरेको लुम्बिनीले २० ओभरमा ८ विकेट गुमाएर १३४ रन बनाएको थियो। डार्ची शर्ट ४५ रनसहित शीर्ष स्कोरर बने भने कप्तान रोहित पौडेलले ३४ र निरोशन डिकेवालाले २९ रन जोडे। विराटनगरका सुबास भण्डारी र प्रतिश जिसीले समान ३–३ विकेट लिए। त्यस्तै, सन्दीप लामिछानेले २ विकेट हात पारे।

जितसँगै लुम्बिनीले अब उपाधिका लागि शनिबार सुदूरपश्चिम रोयल्ससँग प्रतिस्पर्धा गर्ने छ। सुदूर लगातार दोस्रोपटक फाइनल पुगेको हो भने लुम्बिनी इतिहासमै पहिलोपटक फाइनलमा प्रवेश गर्न सफल भएको हो।

लुम्बिनीले पछिल्ला पाँच खेलमा लगातार जित निकालेको छ। उसले काठमाडौँ गोर्खाजलाई ४ विकेटले हराउँदै दोस्रो क्वालिफायरमा स्थान बनाएको थियो। विराटनगर भने पहिलो क्वालिफायरमा सुदूरसँग पराजित भएपछि दोस्रो मौका पाए पनि फाइनलमा पुग्न असफल रह्यो।